علي فين موديانا دنيتنا
دا القسوه زادت أرادت مذلتنا
واحنا الرجال الجد عمر الصعاب
والهد والجروح اللي ما تتعد
ما قدرت فينا تهد
ولا قدرت مذلتنا
طول عمرك شديد
يا قلبي معودتنيش ع الضعف
فهمت فيها كتير وطولت ليها الشرح
غيري براحتك واملكي وحدك الصرح
بس حاسبي من غيرتك لتتحول جرح
دوقي كلامك وشيلي منه الملح
حلاوة الكلام تشرح القلب وتزود محبتنا
الكلام ساعات بيوجع
وبيه العمار ينهار
الكلام صعب يرجع
وللمشاعر قتال
والكلام الزين يريح القلب ويرضي الرجال
ادلعي بس حاسبي الدلع الزايد دا شغل عيال
وإن كان عالهموم طول عمري للهموم شيال
هتشيلي معانا ولا هتزودي شيلتنا
مش احنا اللي
تخاصمينا وتصالحينا بمزاجك
وقت ما تعوزينا نبقي تاجك
ولما إحنا نعوزك ونحتاجك
نلاقيكي مشغوله بمكياجك
ليا كتير معاكي واحترت ف علاجك
لو تغيري بس طباعك تحلي صحبتنا
شوية أهنن وأطبطب والحنيه فينا مغروسه
وبعاملك زي طفله مدلله وشويه زي عروسه
شويه بتحبيني موت وشويه زعلانه ومقموصه
سايبه العمر يعدي والعمر ساعات محسوسه
دا العمر كله يومين خلينا نعيشهم بفرحتنا
ولا إحنا لازم نعيشهم هموم وبهتانه ضحكتنا
من ميته الحب كان بالمزاج
د الحب زاد للفقير والمحتاج
الحب أنت وحبيبك واحد من غير إحراج
وأنا والله بحبك وزي م أنتي محتجاني
أنا ليكي كمان محتاج
ولما تبعدي عني ببقي زي مسجون
مستني إفراج فمدام بتحبيني بلاش عناد
وإن كان علينا عشانك بعنا دنيتنا
وسبنا كل البنات اللي حبتنا
فمتجبريناش عالهجر وترجعي تشكي قسوتنا
كوني زي م أنا عايز إرضيني
حسسيني بإنك ولا لحظه بتنسيني -- حبيني
ساعتها بس إنتي وحدك م الدنيا تكفيني
وأسقيكي من روحي وحنيني
وأوهبلك كل حياتي وسنيني
تعالي نرجع الفرحه تاني بيتنا
واوعي تخلينا يوم نسأل
علي فين موديانا دنيتنا
بقلمي توفيق حسن #جوبا_المصري
ليست هناك تعليقات:
إرسال تعليق