(حقي فين)
حقي فين متقوليلي
حقي فين ؟؟؟
ردي عليا وفهميني
حقي فين ؟؟؟
حقي يابلدي ضايع يابلدي
قصاد عيوني
انا ليا فيكِ ولا مليش
مش عارف اعيش
ولوجيت في يوم نطقت
يخرسوني ...
فهميني ...
فهميني لا حد إمتى
لاحد إمتى هفضل مليش
فيكِ كرامة ؟؟؟
اناالمصري اللي ضحيت
وفي البلاد
معروف بالشهامة
أصبح دلوقتي يا بلدي
مليش فيكِ قيمة
نهبوا حقي
نهبوا حقي ومصوا دمي
متقوليلي إنتِ أمي
ولا مين ؟؟؟
ريحيني حقي فين ؟؟؟
أنا بشتكيلك
إنتِ أمي وحاسة بيا
إنتِ وطني ونبض قلبي
ونور عنيا ...
لو يرضيكِ اللي بيحصلي
إنكساري وألمي وذلي
أنا هبقي راضي
وحاعيش في صمت
طول حياتي
ويعذبوني .. يقطعوني
وبسولار يولعوني
هكتم في صوتي
ولازم أبقي راضي
ما أنا عشت ليكِ
وعمري كله ضاع عليكِ
ومنتظرتش أي شكر
بالعكس فخر
لما أضحي لجلك إنتِ
وأموت فداك
بس أعرف .. نفسي أعرف
إنتِ مغلوبة علي أمـــركِ
ولا كل ده بأمرك
وبرضاكِ
بقلم الشاعر / حســـــــــــــــــــام ابوحمدالله
ليست هناك تعليقات:
إرسال تعليق